ОХУ-ын Гадаад хэргийн яам өчигдөр буюу гуравдугаар сарын 17-ны өдөр мэдэгдэл нийтэлж, АНУ-д суугаа Элчин сайд Анатолий Антоновыг эгүүлэн татсан тухайгаа мэдээлжээ. Ийнхүү Элчин сайдаа эгүүлэн татсаны шалтгааныг ОХУ, АНУ-ын харилцааны хэтийн төлөвийн талаар ярилцах шаардлагатай болсон гэж тайлбарласан байна.
Уг мэдэгдэлд тэмдэглэхдээ, АНУ-ын шинэ засгийн газар байгуулагдаад хоёр сар болох гэж байна. Удахгүй 100 хоног нь тохиох тул АНУ-ын Ерөнхийлөгч Байдены засаг захиргааны үйл ажиллагааны чиглэлийг үнэлэх шаардлагатай болсон гэжээ.
ОХУ, АНУ-ын харилцаа сүүлийн жилүүдэд хурцадмал байдалд байсаар ирсэн бөгөөд цахим аюулгүй байдал, эрчим хүчний аюулгүй байдал, зэвсгийн хяналт, бүс нутгийн халуун цэгийн асуудлаар хоёр улс ил тод санал зөрөлдөөнтэй байгаа юм. Эх сурвалжийн мэдээллээс үзвэл, АНУ-ын тагнуулын байгууллага энэ сарын 16-нд АНУ-ын 2020 оны Ерөнхийлөгчийн сонгуулийн үеэр ОХУ Трампыг дэмжиж, Байдены сурталчилгааны багийг дарсан гэсэн тайлан гаргажээ. ОХУ-ын Ерөнхийлөгчийн хэвлэлийн нарийн бичгийн дарга Песков мөн 17-ны өдөр хэлэхдээ, 2020 оны АНУ-ын ерөнхийлөгчийн сонгуульд хөндлөнгөөс оролцлоо гэж ОХУ-ыг буруутгаж байгаа нь үндэслэлгүй бөгөөд нотлогдоогүй байна гэжээ.
