УИХ-ын гишүүн Б.Бат-Эрдэнэ цар тахлын хөл хорио зарлаж, бүх нийтийн бэлэн байдал зарлаад байгаа энэ үед УИХ-ын гишүүдийг хариуцлагатай байхыг уриалжээ. Тухайлбал, УИХ-ын зарим гишүүн дэг журам сахиулж буй цагдаагийн алба хаагчдын талаар гомдол гаргасан, мөн чуулганы хуралдаанд цахимаар оролцохдоо хариуцлагагүй хандсан зэргээс үүдэн хэд хэдэн санал гаргасан байна.
Тэрбээр энэ тухайгаа “Бүх нийтийн бэлэн байдлын зэрэгт шилжсэн хариуцлагатай цаг үед УИХ-ын гишүүдийн зүгээс баримталж, анхаарч ажиллах шаардлагатай байгаа хэд хэдэн зүйлийн тодорхой саналыг Ёс зүй, сахилга хариуцлагын байнгын хорооноос хүргүүлсэн болно. Гэтэл нөхөд маань анхааран авлага болгосон нь бага байгаа нь харамсалтай.
Өчигдрийн нэгдсэн чуулганд л гэхэд өөрийн биеэр хүрэлцэн ирж оролцож байгаа УИХ-ын удирдлагын бүрэлдэхүүн цөөхөн хүмүүст халдвар хамгааллын дэглэм сахиулж, маск зүүлгэх шаардлага тавиад бүрэн хэрэгжсэнгүй.
Уг нь дээд талаасаа айл гэрт бол аав ээж ах эгч нь, албан газар дарга удирдлага нь, улс оронд итгэж байгуулсан төрийн дээд удирдлагын хүмүүс нь өөрөөсөө үлгэр, манлайллыг үзүүлж, ёс зүйг эрхэмлэн, хууль журмыг чандлан биелүүлж ажиллах учиртай тэгж байж урагшилна, тулгарах аюул занал, бэрхшээл хүндэрлийг давна. Өмнөх парламентын үед халдвар хамгааллын дэглэм сахиулах талаар зарчмын шаардлага тавихад зарим нэг гишүүд бүлэглэн эсэргүүцэж над руу дайрч байсан иймээс бурууд нүд хурц байж итгэж өөрсдийн элч болгон төрд илгээсэн хүмүүсээ шахаж шаардаж байхыг иргэд сонгогчдоосоо ил тод нээлттэй мэдээлж өгөхийг хэвлэлийнхэн сэтгүүлчдээсээ хүсье” гэжээ.
