Киноны уран бүтээлчдийн дунд уралдаан зарлалаа

Нийслэлийн Засаг даргын Тамгын газар, нийслэлийн Соёл урлагийн газар, Монголын урлагийн зөвлөл, “Номадиа” пикчерс хамтран Монголын кино урлагийг хөгжүүлэх, суран бүтээлчдийн чадавхыг бэхжүүлж, олон улсын хамтын ажиллагаа, өрсөлдөх чадварыг нэмэгдүүлэх, дэлхийн шилдэг кино бүтээлийг Монголын үзэгчдэд хүргэх зорилгоор “Улаанбаатар” олон улсын кино наадмыг зохион байгуулдаг. 12 дахь удаагийн “Улаанбаатар” олон улсын кино наадам ирэх аравдугаар сарын 19-25-нд болно. Түүнчлэн тус кино наадмыг Монгол эсвэл Монгол-олон улсын хамтарсан кино бүтээлээр нээдэг уламжлалтай. Үүний хүрээнд кино найруулагч, уран бүтээлчдийн дунд “Улаанбаатар” олон улсын кино наадмын нээлтийн киног сонгон шалгаруулах уралдаан зарлажээ. Кино наадмын нээлтийн кинонд өрсөлдөх бүтээлийг ирэх сарын 20-ныг хүртэл хүлээн авах аж.