Франкфурт-Улаанбаатарын чиглэлийн тусгай үүргийн онгоцоор өнөө өглөө ирсэн 266 хүнд ХӨСҮТ-ийн эмч нар үзлэг хийж, шинжилгээний дээж авчээ. Зорчигчдоос дөрвөн хүнийг коронавирусийн шинж тэмдэгтэй байж болзошгүй гэж үзсэн тул ойрын хавьтлын дөрвөн хүнийх нь хамт ХӨСҮТ-д тусгаарлажээ. Энэ талаар ХӨСҮТ-ын ерөнхий захирал Д.Нямхүү мэдээлэв.
Өчигдөр ХӨСҮТ болон Дархан-Уул аймаг дахь лабораторид нийт 264 хүний сорьцонд шинжилгээ хийхэд бүгд сөрөг гарчээ. Одоо ХӨСҮТ-д 70 хүн эмчүүлж байгаагийн 64-ийнх нь биеийн байдал хөнгөн, зургаан хүн хүндэвтэр оноштой байгаа ажээ.
