Токио хотын захиргааны мэдэгдсэнээр, Токиогийн олимпын наадам, паралимпын гол бамбарын цамхаг устөрөгчөөр шатахуун болгох бөгөөд энэ бол олимпын түүхэнд гол бамбарт нүүрстөрөгчийн давхар исэл ялгаруулдаггүй түлш хэрэглэх анхны тохиолдол юм гэжээ.
Японы “Майничи Шимбун” сонины мэдээлснээр, урьдын олимпын наадмын төв бамбарт бүгдэд нь пропан хий буюу шингэрүүлсэн нефтийн хий хэрэглэж байсан аж. Нүүрстөрөгчийн давхар исэл үл ялгаруулах устөрөгч түлштэй төв бамбар нь “нүүрстөрөгчгүй нийгэм”-ийг байгуулахад тустай, энэ удаагийн олимпын наадмаар санаачилсан “тогтвортой байдал”-ын бэлэг тэмдэг юм гэж Японы хэвлэлд онцолжээ.
Эх сурвалжийн мэдээлснээр, устөрөгч шатахууныг Японы зүүн нутгийн газар хөдлөлтийн гамшигт өртсөн Фукушима мужийн Нагаеход шинээр байгуулсан үйлдвэрт үйлдвэрлэж, Токиогийн олимпын наадмын зохион байгуулах хороо ч устөрөгчөөр ариун галын шатахуун болгох замаар дэлхий нийтэд устөрөгч түлштэй зайны машин зэрэг Японы технологийг сурталчлахыг хүсэж байгаа юм байна.
2020 оны Токиогийн олимпын наадмын ариун галыг энэ оны гуравдугаар сарын 12-нд Грекийн Олимпиагаас авах бөгөөд Грект 10 хоног орчим дамжуулсны дараа ариун галыг агаарын тээврээр Японд авчирч, гуравдугаар сарын 26-наас Японы дотоодод дамжуулах юм. Долдугаар сарын 24-нд Токиогийн үндэсний шинэ төв цэнгэлдэх хүрээлэнд Олимпын наадмын нээлтийн ёслол болж, төв бамбарыг асаах юм байна.
