ЭМЯ-наас коронавируст халдвар “Ковид-19”-ийн өвчлөлийн нөхцөл байдлын талаар ээлжит мэдээллээ хийлээ. Өнгөрсөн 24 цагийн хугацаанд 815 тохиолдол шинээр илэрч, улсын хэмжээнд нийт тохиолдол 44016 болжээ. Шинээр илэрсэн тохиолдлуудыг задалж үзвэл дотоодоос 810, эмнэлгээс шалтгаалах халдвар буюу эрүүл мэндийн ажилтан, эмч нар ковидоор өвчилсөн 5 тохиолдол бүртгэгдсэн байна. Улаанбаатарт 711 тохиолдол, хөдөө орон нутагт 99 тохиолдол бүртгэгдсэн аж. Өнгөрсөн 24 цагт 1451 иргэн эдгэрч гарснаар нийт 29984 хүн эдгэрээд байна. Ковидын улмаас өнгөрсөн нэг хоногт 7 хүн нас баржээ.
