Сонгуулийн ерөнхий хорооноос өнгөрсөн амралтын өдрүүдэд зохион байгуулсан хяналтын тооллогын дүнг танилцууллаа. Энэ сарын 24-нд болсон УИХ-ын сонгуулийн санал хураалтын дүнг зарим нам эвсэл, бие даан нэр дэвшигч хүлээн зөвшөөрөхгүй байгаагаа Ерөнхийлөгчид мэдэгдсэн бөгөөд Ерөнхийлөгч сонгуулийн дүнд хяналтын тооллого явуулах албан чигийг Сонгуулийн ерөнхий хороонд хүргүүлсэн юм. Мөн Ерөнхийлөгч Сонгуулийн ерөнхий хорооны удирдлагуудыг хүлээн авч уулзсан.
Ингээд тус хорооноос Архангай аймгийн 1 дүгээр тойрог, Дорнод аймгийн 7 дугаар тойрог, Өвөрхангай аймгийн 10 дугаар тойрог, Өмнөговь аймгийн 11 дүгээр тойрог, Дархан-Уул аймгийн 19 дүгээр тойрогт хяналтын тооллогыг нэмж хийжээ.
Сонгуулийн ерөнхий хорооны дарга Ч.Содномцэрэн “Ерөнхийлөгчид хүргүүлсэн гомдол шаардлага, Ерөнхийлөгчөөс СЕХ-нд хандаж ирүүлсэн албан бичиг, гишүүдийг хүлээн авч уулзаад өгсөн үүрэг даалгаврын талаар мэдээлье. Гомдол гаргасан тойрог, хэсгүүдэд 27, 28-ны өдрүүдэд хяналтын тооллого хийх нь зүйтэй гэсэн чиглэлийг өгсөн. Зургаадугаар сарын 27, 28-ны 00:21 хүртэл хяналтын тооллого хийлээ. Хяналтын тооллогод 2,447 төрийн албан хаагч ажиллалаа. Хяналтын тооллого хийхэд 71.3 сая төгрөгийн зардал гарлаа. Хяналтын тооллогыг 164 хэсэгт хяналтын тооллого хийхэд санал тоолох машинтай зөрсөнгүй гэсэн мэдээ тайлан ирлээ” хэмээн мэдэгдэв.
