Ерөнхийлөгч өнөө өглөө Сонгуулийн ерөнхий хороо, ТЕГ, ЦЕГ-ын удирдлагуудтай уулзлаа. Энэ үеэр гараар хяналтын тооллого явуулж маргаантай асуудлыг шийдвэрлэх, хяналтын тооллогыг энэ амралтын өдрүүдээр хэвлэл мэдээлэл, оролцогч талуудыг байлцуулан явуулах ёстой гэж үзэж байгаагаа илэрхийлжээ. Ерөнхийлөгч Х.Баттулга “Сонгуулийн ерөнхий хороо хүнд суртал гаргаж олон нийтийг бухимдуулалгүй асуудлыг яаралтай шийдээд хуульд зааснаар 50 хувь хүртэл гар тооллого хийж болдог, тэр дагуу тооллого хийгээч ээ. Энэ талаар Сонгуулийн ерөнхий хорооны дарга Ч.Содномцэрэн, нарийн бичгийн дарга Ц.Болдсайхан та хоёр бол туршлагатай хүмүүс” хэмээн онцлов. Төрийн тэргүүн маргаантай тойргуудад хяналтын тооллого явуулах асуудлаар байр сууриа илэрхийлсэн албан бичгээ Сонгуулийн ерөнхий хороонд хүргүүлсэн юм байна.
