Улиасны унгирлыг тусгай машинаар цэвэрлэж байна

Жил бүрийн өдийн улиасны унгирал задарч, гудамж талбайд хөглөрөх, хүний нүд, аманд орох зэрэг хүндрэл үүсгэдэг. Тиймээс энэ долоо хоногоос нийслэлийн хэмжээнд улиасны унгирлыг тусгай зориулалтын машинаар цэвэрлэх ажлыг эхлүүлжээ. Ингэхдээ ногоон байгууламжийг арчилж, тордох ажлын хүрээнд улиас моднуудыг даралттай усаар шүршиж, унгирал буюу молцгийг нь багасгадаг байна. Улиасны унгирал цэвэрлэх тусгай зориулалтын машин дүүрэг бүрт ажиллаж байгаа бөгөөд ногоон байгууламжийн чиглэлээр мэргэшсэн төрийн бус байгууллагынхан газар дээр нь хяналт тавьж байгаа гэдгийг Улаанбаатар хотын Захирагчийн ажлын албанаас мэдээлжээ.