ЭМЯ коронавирусийн нөхцөл байдлын талаарх ээлжит мэдээллээ хийлээ. ХӨСҮТ-ийн захирал Д.Нямхүү, 2020 оны зургаадугаар сарын 11-нд ХӨСҮТ-ийн вирус судлалын хоёр лаборатори, Дархан-Уул аймаг дахь лабораторид нийт 241 хүнд шинжилгээ хийснээс 238 хүнд илрээгүй. Нурсултан-Улаанбаатарын тусгай үүргийн онгоцоор ирсэн 184 хүнд шинжилгээ хийхэд гурван хүнээс коронавирус илэрсэн болохыг мэдээллээ. Ийнхүү манай улсад коронавирусийн батлагдсан тохиолдол 197 болж, үүнээс 95 хүн эмчлэгдэн эдгэрсэн бол 102 хүн эмчлэгдэж байгаа, тэдгээрээс 91 хүн хөнгөн, 11 хүний биеийн байдал хүндэвтэр байгаа ажээ.
Тандалтын зорилгоор Сонгинохайрхан дүүргийн нэгдсэн эмнэлгээс зургаан хүний дээж авч шинжлэхэд коронавирус илрээгүй байна. Мөн ХӨСҮТ-д тусгаарлагдсан хоёр иргэний шинжилгээнээс коронавирус илрээгүй, Увс аймагт тусгаарлагдсан 11, Сэлэнгэ аймагт тусгаарлагдсан хоёр хүний давтан шинжилгээнээс тус тус вирус илрээгүй. Алтанбулаг боомтоор орж ирсэн 39 авто тээврийн жолоочийн шинжилгээнээс вирус илрээгүй байна.
Өнөөдөр ХӨСҮТ-д эмчлүүлж байсан зургаан хүн бүрэн эдгэрч сувилал руу шилжжээ. Тэдний дөрөв нь БХИС-ийн сонсогч нар, хоёр нь Алтанбулагийн боомтоор орж ирсэн оюутнууд юм байна. Эдгэрсэн оюутнууд насны хувьд дөрөв нь 19-20 насных, нэг нь 33 настай аж. Тавдугаар сарын 13,14-нд эх орондоо ирж оношлогдсон эдгээр оюутнууд ийнхүү 27 хоног эмчлэгдээд эдгэрчээ. Ийнхүү эдгэрсэн хүмүүсийн нас, хүйс, эмчлүүлсэн хоногийг мэдээлж байгаагийн учир нь энэ бүх мэдээллийг нэгтгэн эмчилгээний арга, тактик, үр дүнг харьцуулан судлахад ач холбогдолтой гэдгийг ХӨСҮТ-ийн захирал Д.Нямхүү онцоллоо.
