Дуурь бүжгийн эрдмийн театр байгуулагдсаны 70 ойд зориулсан “Монголын уран барилга” сэдэвт марк худалдаанд гарчээ. ДБЭТ-ын барилга архитекторын онцлог, түүхэн дурсгалт үнэ цэнийг илэрхийлсэн энэхүү марк зургаадугаар сарын 04-нд албан ёсоор худалдаанд гарсан бөгөөд 20000 сери, 10000 хэлхээ хэвлэгдсэн юм байна. Маркны хэмжээ 40х30 мм, хэлхээний хэмжээ: 190х180 мм, 70х150 мм ажээ. Маркийн зураачаар Ч.Бат-Эрдэнэ, Б.Баярхүү, дизайнераар Ж.Ганхуяг ажиллажээ.
ДБЭТ-ын барилга сонгодог неоклассицизм, үндэсний дүрслэх урлагтай хослуулан синтез урлаг болгон хөгжүүлсний тод жишээ, дайны дараах энх цагийн бүтээн байгуулалт, дурсгалт барилгад зүй ёсоор ордог. Төв театрын зураг төслийг 1942 онд Герман улсын архитектор Герхард Козель хийж, 1949 онд барьж ашиглалтад оруулсан юм байна. Театрын дотор, гадна чимэглэлийг Б.Чимэдээр ахлуулсан Монголын ахмад уран бүтээлчид буюу зураач О.Цэвэгжав, Д.Чойдог, Д.Маньбадар, Ү.Ядамсүрэн, уран барималч С.Чоймбол, Н.Жамбаа, А.Даваацэрэн, А.Доржготов нар гүйцэтгэсэн түүхтэй.
