Хэнтий аймгийн Засаг дарга Н.Ганбямба улсын тэргүүний Баян-Овоо суманд өнөөдөр ажиллаж байна. Тэрбээр тус суманд ирэх зургадугаар сарын нэгэнд ашиглалтад орох шинэ цэцэрлэгийн барилгын ажилтай танилцжээ. Улсын төсвийн 1.2 тэрбум төгрөгийн хөрөнгө оруулалтаар баригдаж буй 125 хүүхдийн ортой тус цэцэрлэгийн барилгын ажлыг “Гурван бухат” ХХК гүйцэтгэж байгаа бөгөөд барилгын ажил 90 орчим хувьтай үргэлжилж байгаа ажээ.
Мөн тус суманд, сумын төвийн инженерийн шугам сүлжээ 1,3 тэрбум төгрөгөөр өнгөрсөн онд ашиглалтад орж, бүх төсөвт байгууллагууд, амины орон сууцууд дулаан, цэвэр усны шугамд холбогджээ. Энэ онд бохирын шугам нэмж суурилуулахаар төлөвлөсөн байна.
