Хэвлэлийн эрх чөлөөний өдрийг тохиолдуулан олгодог “Үнэний төлөө” 12 дахь удаагийн шагналыг өнөөдөр гардууллаа. “Үнэний төлөө-2020” хэвлэлийн эрх чөлөөний шагналыг “Өнөөдөр” сонины Эрэн сурвалжлах, экологийн мэдээллийн албаны сурвалжлагч Гансүх овогтой Цолмон хүртлээ.
Тэрээр 2003 оноос хойш “Өнөөдөр” сонины эрэн сурвалжлах албанд ажиллаж байгаа бөгөөд Эрэн сурвалжлах цуврал нийтлэлүүдээрээ энэхүү шагналыг хүртэх болзлыг хангажээ.
Ташрамд сонирхуулахад, Монголын ардчилал, үзэл бодлоо илэрхийлэх эрх чөлөөний сорил болсон 2008 оны долоодугаар сарын 1-ний үйл явдлыг шуурхай сурвалжлан олон нийтэд үнэнийг хэлэхийн төлөө мэргэжлийн эр зориг гарган үнэний төлөө хувь нэмэр оруулсан 8 сэтгүүлч, хэвлэл мэдээллийн байгууллагын ажилтанд анх удаа “Үнэний төлөө” хэвлэлийн эрх чөлөөний шагнал олгосон юм.
УИХ-ын сонгуулийн үр дүнг эсэргүүцэгчдийн МАХН-ын үүдэнд хийсэн жагсаал цуглаан, түүний дараа үүсэж бий болсон эмх замбараагүй байдлыг сурвалжилж яваад халдлагад өртөн гэмтэж бэртсэн “Өнөөдөр” сонины гэрэл зурагчин Б.Бямба-Очир, “Монголын мэдээ” сонины гэрэл зургийн сурвалжлагч Н.Ариунаа, ТВ-8 телевизийн зураглаач Н.Батбаяр, МҮОНТВ-ийн ММ агентлагийн сэтгүүлч Х.Эрдэнэбулган, http://www.gogo.mn/ вэб сайтын зураглаач Т.Анхтамир, Ийгл ТВ-ийн зураглаач Д.Ууганбаатар, Л.Өлзийбаяр, энэ үеэр хүний амь эрсдсэн тухай хамгийн түрүүн олж мэдээлсэн МҮОНТВ-ийн ММ агентлагийн сэтгүүлч Б.Баасанбямба нар Хэвлэлийн эрх чөлөөний шагналын анхны эзэд болсон юм.
