Шүлсээ хаявал шар хуудсаар торгоно

Английн хөлбөмбөгийн Премьер лиг коронавирусийн тархалтыг хязгаарлах үүднээс тоглолтын дундуур шүлсээ хаясан дасгалжуулагч, тамирчдад шар хуудас олгох шийдвэрийг хэлэлцэж байна. Дэлхийн хамгийн өрсөлдөөнтэй лиг болох Премьер лиг ирэх зургаадугаар сарын 8-нд эргэн үргэлжлэх төлөвлөгөөтэй байгаа учир засгийн газрынхаа хэрэгжүүлж буй бүхий л зөвлөмж, зааврын дагуу ажиллах хэрэгтэй болсон. Одоогийн байдлаар “Арсенал”, “Тоттенхэм Хотспур”, “Вест Хем” багууд бэлтгэлийн баазуудаа нээж, тамирчдаа бэлтгэл хийхийг зөвшөөрсөн нь түр хугацаанд зогсоод буй лигээ үргэлжлүүлэх эхний алхам болж байна. FIFA буюу Олон улсын хөлбөмбөгийн холбооны Эрүүл мэндийн хорооны дарга Майкл Д’Хүй тамирчид талбай дээр шүлсээ хаях нь цар тахлын тархалтыг дэмжинэ гэж бодож байгаагаа мэдэгджээ. Тэрбээр “Хөлбөмбөгт шүлсээ хаях нь энгийн үзэгдэл бас үнэхээр эрүүл ахуйн бус үйлдэл. Хэрэв бид хөлбөмбөгийн эргүүлэн авчрахыг хүсвэл үүсч болох эрсдэлтэй алхмуудаас зайлсхийх хэрэгтэй. Хөлбөмбөгөө үргэлжлүүлэхээс өмнө маш анхааралтай бодох хэрэгтэй” хэмээжээ. Мөн үүнээс гадна Английн Премьер лиг солилцоо наймааны цонхоо ирэх наймдугаар сар гэхэд нээх төлөвлөгөөтэй байгаа аж.