ХЭҮК-ын дарга Ж.Бямбадорж ажлаас чөлөөлөгдөх өргөдлөө УИХ-ын дарга Г.Занданшатарт өгчээ. Чөлөөлөх асуудлыг Хууль зүйн байнгын хорооны хуралдаанаар хэлэлцэнэ.
“Зөв амьдрах ухаан” ТББ-ын тэргүүн Г.Загдаагийн ХЭҮК-ын даргатай утсаар ярилцаж буй бичлэг олон нийтэд цацагдсан бөгөөд тухайн бичлэгт хараалын үг ашигласан нь шүүмжлэл дагуулаад байгаа юм. Тэрбээр энэ талаар тайлбарлахдаа хараалын утгаар тухайн үгийг ашиглаагүй, улмаар уг ТББ-тай холбоотой баримтуудыг мэдээлж, тухайн ярианы бичлэг нь тасалж эвлүүлсэн гэдгийг хэлсэн. Түүгээр зогсохгүй энэхүү бичлэгээр сүүлийн нэг жилийн турш дарамталж байгаа гэдгийг тайлбарлаж байсан юм.
Ж.Бямбадорж нь Ховд аймгийн Дарви суманд төрсөн. Эхнэр, нэг хүүхдийн хамт амьдардаг. Оросын холбооны улсын Москва хотын улсын их сургуулийг хуульч мэргэжлээр төгссөн, эрх зүйч мэргэжилтэй, хууль зүйн ухааны доктор. Тэрбээр 1992-1996, 1996-2000, 2000-2004 онд УИХ-ын гишүүн, УИХ-ын дэд дарга, 2004-2010 онд Үндсэн хуулийн цэцийн дарга, 2010-2020 онд Хүний эрхийн үндэсний комиссын гишүүн, даргаар ажиллаж байна.
