Сэлэнгэ аймгийн Мандал сумын 35 настай эмэгтэй А-д коронавирусийн шинж тэмдэг илэрсэн тул өчигдөр тусгаарлажээ. Уг эмэгтэй нөхрөө эмчилгээнд авч явсан бөгөөд Энэтхэгт 10, Туркэд тав хоноод 22 хоногийн өмнө эх орондоо ирсэн юм байна. Ирсэн даруйдаа нөхөртэйгөө хамт 14 хоног гэртээ тусгаарлагдаж биеэ хянасан аж. Ингээд шинж тэмдэг илрээгүй тул хэвийн дэглэмд шилжжээ. Гэтэл гурав хоногийн өмнөөс бага зэрэг ханиалгаж, өчигдөр өглөө цээжээр хатгуулах зовиур илэрсэн тул сумынхаа нэгдсэн эмнэлгэд хандсан юм байна. Сэлэнгэ аймгийн Эрүү мэндийн газраас эмч нар Мандал суманд очиж тухайн иргэнээс сорьц, шинжилгээ авч өчигдөр орой ХӨСҮТ рүү илгээжээ.
Одоогоор Мандал суманд хөл хорио тогтоож вирусийн халдвартай байж болзошгүй иргэнтэй ойр байсан, уулзсан хүмүүсийг тусгаарлаад байна.
