Эдүгээгээс 39 жилийн тэртээ буюу 1981 оны гуравдугаар сарын 22-нд монгол хүн анх сансарт нисэв. Тухайн үед хэрэгжүүлсэн “Интеркосмос” хөтөлбөрийн дагуу 39 жилийн тэртээх гуравдугаар сарын 22-оос 30-ны өдрүүдэд ЗХУ, БНМАУ-ын сансрын хамтарсан нислэг амжилттай болсон юм. БНМАУ-ын иргэн Ж.Гүррагчээ, Зөвлөлтийн сансрын нисэгч В.А.Жанибековын хамт сансрын “Союз-39” хөлгөөр нисч, тойрог замын “Салют-6” станцын олон улсын багийн бүрэлдэхүүнд ажиллан, сансрын нисэгч В.Н.Ковалёнок, В.П.Савиных нарын жолоодсон тойрог замын эрдэм шинжилгээний “Союз-Т4” цогцолбороор амжилттай нислэг хийжээ. Монгол хүн сансарт ниссэнтэй холбогдуулан АИХ-ын Тэргүүлэгчдийн 89 дүгээр зарлигаар БНМАУ-ын сансрын нисэгч цолыг буй болгож Ж.Гүррагчаа, М.Ганзориг нарт хүртээжээ. Мөн сансрын нисэгч В.А.Жанибеков, Ж.Гүррагчаа нарт ЗХУ-ын болон БНМАУ-ын баатар цол олгосон юм. Ийнхүү В.А.Жанибеков ЗХУ-ын хошой баатар болсон бол Ж.Гүррагчаа ЗХУ-ын баатар цол хүртсэн цорын ганц монгол хүн болжээ.
Монгол хүн сансарт ниссэний дараах баярт агшнуудыг харуулсан гэрэл зургуудыг толилуулж байна.
