Нийслэлийн ИТХ-ын Тэргүүлэгчдийн өчигдрийн болзошгүй гамшгийн үед түр цугларах газрын байршлын тоог нэмэх асуудлыг хэлэлцэж, тогтоолын төсөл баталжээ. Нийслэлийн ИТХ-ын Тэргүүлэгчдийн 2016 оны 94 дүгээр тогтоолоор болзошгүй гамшгийн үед түр цугларах газрын байршил, тоо хэмжээг тогтоосон байдаг. Уг тогтоолоор есөн дүүргийн хэмжээнд 111 байршилд түр цуглахаар төлөвлөн баталсан аж. Энэ тоог 82-оор нэмж нийт 193 байршилд түр цуглахаар тогтсон байна. Энэ талаар нийслэлийн Онцгой байдлын газрын дарга, хурандаа Ж.Чүлтэмсүрэн “Гамшгаас хамгаалах, иргэдийн аюулгүй байдлыг хамгаалах чиглэлээр 2016 онд анх 111 байршыг тогтоож байсан. Үүнээс хойш эрх зүйн орчин шинэчлэгдсэн учраас өөрчлөх шаардлага тулгарсан. Өнгөрсөн онд иргэдийг хамруулсан иж бүрэн сургалт, ажлыг зохион байгуулсан. Эндээс түр цугларах байршлуудын тоог нэмэгдүүлэх нь зүйтэй гэдэг шийдвэр гарсан” хэмээн ярилаа.
