Популист удирдагчдын хөлд улс орноороо чирэгдэж зовж зүдэрч буй венесуэлчүүд амьдрахын тулд аргаа барж байгаа ажээ. Үүний илрэл нь улсынхаа мөнгөн тэмдэгтээр цүнх, хэтэвч, бүс зэргийг урлан худалдаалж байгаагаас нь харж болно. Венесуэлийн мөнгөн тэмдэгт боливарийн ханш 99 хувиар унаж цаас болж хувирсан аж. Тиймээс дундаж орлоготой венесуэл иргэн сарынхаа цалингаар ердөө л нэг килограмм үхрийн мах авах хэмжээнд тулжээ.
Улс оронд нь гиперинфляци нүүрлэж хүнд нөхцөл байдалд орсон иргэд эрээн цаас болж хувирсан үндэсний мөнгөн тэмдэгт боливараар гар урлалын бүтээгдэхүүн хийж жуулчдад доллараар худалдан орлого олох болжээ.
Колумбын Кукута хэмээх Венесуэлтэй хил залгаа хотод очсон Есүс Кампос болон түүний эхнэр Габриэла нар боливарын дэвсгэртүүдээр сүлжиж хийсэн цүнх, түрийвчээ орон нутгийн зах, нийтийн эзэмшлийн талбайгаар өдөржин явж худалдаалдаг байна. Тэд 200 ширхэг венесуэл мөнгөн тэмдэгт боливараар нэг түрийвч хийж 10 доллараар зардаг аж. Гэтэл энэ хэмжээний боливараар Венесуэлд ганц шил ундаа л авдаг байна. Мөнгөн тэмдэгтээр хийсэн цүнх, хэтэвчийг нь сонирхон үзсэн хүмүүс жинхэнэ боливар мөн үү гэж асуудаг хэмээн Кампос ярьжээ.
