Японы мэргэжлийн сүмогийн нэгдүгээр сарын хацү башё маргааш өндөрлөнө. Башёгийн 13 өдрийн дараахь байдлаар дээд зиндааг маэгаширагийн баруун жигүүрийн 4 дэх бөх Шодай 12 даваа нэг унаатайгаар тэргүүлж, түүний араас 11 даваа, хоёр унаатай озэки Такакэйшо хамгийн ойрхон нэхэж байна. Үлдсэн хоёр өдрийн барилдаанд Шодай дараалан унахгүй л бол түрүүлэх нь тодорхой болсон гэсэн үг. Өөрөөр хэлбэл Шодай өнөөдөр давчих юм бол дээд зиндаанд түрүүлэх болзлоо хангана.
Дээд зиндаанд барилдаж буй монгол сүмочдын хувьд энэ сард анх дээд зиндаанд барилдсан Кирибаяма Б.Лхагвасүрэн өчигдөр давснаар есөн даваа дөрвөн унаатай болжээ. Тэрээр ийнхүү 50-иас дээш хувийн амжилтаа үзүүлсэн тул ирэх гуравдугаар сард маэгаширагийн нэлээд дээд хэсэгт эрэмбэлэгдэх нь. Тамаваши Б.Мөнх-Оргил өчигдөр унаснаар гурван даваа, 10 унаатай болж энэ сарын башёг амжилт тааруу өндөрлүүлэх нь. Тэрбээр хацү башёд маэгаширагийн зүүн жигүүрийн гурваас босч барилдаж буй юм.
Дээд зиндаанд барилдаж буй Азүмарү С.Тодбилэг зургаан даваа, долоон унаатай тэмцээнийг үргэлжлүүлж байна. Тэрбээр үлдсэн хоёр барилдаанд өвдөг шороодолгүй барилдвал 50-иас дээш хувийн амжилтаа үзүүлнэ.
Жюүрёод барилдаж буй монгол сүмочдоос Тэрүнофүжи Г.Ган-Эрдэнэ урамтай сайн барилдаж нэг ч өвдөг шороодолгүй тэргүүлж явна. Тэрээр өнгөрсөн оны арваннэгдүгээр сарын кюүшюү башёд макүшита зиндаанд нэг ч өвдөг шороодолгүй түрүүлэн жюүрёогийн баруун жигүүрийн 13-т эрэмбэлэгдсэн юм. 2015 онд дээд зиндаанд түрүүлэн эзэн хааны цом гардаж, озэки цолонд хүрч байсан Тэрүнофүжи Г.Ган-Эрдэнэ хүнд бэртлийн улмаас олон башё өнжиж, жонидан зиндаанд хүртлээ эрэмбэ буураад байсан билээ.
Жюүрёод барилдаж буй монгол сүмочдоос Хоошорюү С.Бямбасүрэн өчигдөр давснаар найман даваа, таван унаатай болж 50-иас дээш хувийн амжилтаа үзүүллээ. Тэрбээр ийнхүү жюүрёод дэвшсэн хоёр дахь башёдоо амжилттай сайн барилдлаа. Жюүрёогийн бөхчүүдээс Ичиножо А.Ичинноров, Сакигакэ Я.Баттүшиг нар өчигдөр унаснаар накикоше буюу 50 хувийн амжилтаа үзүүлж чадсангүй. Харин Чиёошомо Г.Мөнхсайхан, Миторюү Б.Төрболд нар үлдсэн хоёр өдөр давж чадвал 50-иас дээш хувийн амжилтаа үзүүлж, дараагийн башёд эрэмбэ дээшлэх боломжтой.
