Ливан, Израил, Америк гурван тал Вашингтон хотноо дөрвөн өдөр үргэлжилсэн гал зогсоох, цэргээ татах асуудлаарх ээлжит хэлэлцээгээ өндөрлүүлж, 6-р сарын 26-нд гурван талт хэлэлцээрт гарын үсэг зурсан юм. Уг хэлэлцээрт Ливан, Израилаас Америкт суугаа элчин сайд нар болон Америкийн албаны хүмүүс хамтран гарын үсэг зурсан байна.
Мөн өдрийн орой Америк, Иран харилцан ойлголцлын санамж бичигт гарын үсэг зурсны дараа бүс нутгийн нөхцөл байдал дахин хурцаджээ. Ираны өмнөд нутгийн Сирик бүсэд дэлбэрэлт болсон бөгөөд үүний дараа Америкийн арми Ираны пуужин, нисгэгчгүй нисэх төхөөрөмж хадгалж байсан байгууламжууд болон эргийн радарын станцуудад агаарын цохилт өгснөө баталжээ. Америкийн тал энэ нь Хормузын хоолойд худалдааны хөлөг онгоц халдлагад өртсөн хэрэгт өгсөн хариу арга хэмжээ гэж мэдэгдсэн байна. Энэ нь хоёр тал санамж бичигт гарын үсэг зурснаас хойш Америкийн арми Иранд анх удаа цохилт өгсөн тохиолдол болжээ.
Ираны Исламын хувьсгалт корпус мэдэгдэхдээ, бүс нутаг дахь Америкийн цэргийн байрлалуудад хариу цохилт өгсөн гэжээ. Мөн Ираны тал үүнээс өмнө Хормузын хоолойгоор явж байсан “журам зөрчсөн” хөлөг онгоцуудад анхааруулах зорилгоор буудсан хэмээн мэдэгдсэн байна.
Америкийн ерөнхийлөгч Дональд Трамп хэлэхдээ, Иран дамжин өнгөрч байсан усан онгоцнууд руу хамгийн багадаа дөрвөн нисгэгчгүй нисэх төхөөрөмж илгээсний нэг нь том оврын ачааны хөлгийг онож, үлдсэн гурвыг Америкийн арми устгасан гэжээ.
