ОХУ-д түлшний хямралтай тэмцэхийн тулд дизель түлшний экспортыг хориглох асуудлыг Засгийн газар авч хэлэлцэж байгаа гэж ОХУ-ын Шадар сайд Александр Новак Ерөнхийлөгч Владимир Путинтай уулзах үеэрээ мэдэгджээ. Тэрбээр нөхцөл байдлыг “амаргүй, гэхдээ хянаж болохоор” хэмээн үнэлсэн байна.
ОХУ-ын төв хэсэг дэх хэд хэдэн томоохон газрын тос боловсруулах үйлдвэрт Украины тал дроноор цуврал цохилт өгсний улмаас энэ сард бензин үйлдвэрлэл өнгөрсөн оны мөн үетэй харьцуулахад 25 хувиар буурч, хомстол үүсэх нөхцөлийг бүрдүүлсэн байна.
Улмаар ОХУ-ын олон бүс нутагт бензин, дизель түлшний борлуулалтыг хязгаарласан бол Крымд хувь хүмүүст түлш худалдаалахыг бүрэн зогсоожээ. Сүүлийн өдрүүдэд түлшний худалдаанд хязгаар тогтоосон бүс нутгийн эрх баригчид түлшний нөөц хангалалттай, хэт их эрэлт болон зориудын хомстол үүсгэхгүйн тулд хязгаарлалт тогтоосон гэж мэдэгдэж байгаа аж.
Эх сурвалж: ВВС, Reuters
