АНУ-ын Ерөнхийлөгч Доналд Трамп БНХАУ-д айлчлал хийгээд буцсанаас ердөө дөрөв хоногийн дараа ОХУ-ын Ерөнхийлөгч Владимир Путин Бээжинг зорьжээ.
Ерөнхийлөгч Владимир Путины онгоц 05 дугаар сарын 19-ний өдрийн 23:20 цагт Бээжингийн “Шоуду” нисэх буудалд газардсан байна. Түүнийг нисэх буудал дээр БНХАУ-ын Гадаад хэргийн сайд Ван И угтан авчээ.
Албан ёсны айлчлалын үндсэн хөтөлбөр өнөөдөр буюу 05 дугаар сарын 20-ны өдөр товлогдсон байна. Лхагва гарагийн өглөө БНХАУ-ын дарга Ши Жинпинь Тяньаньмэний талбай дээр ОХУ-ын Ерөнхийлөгч Владимир Путиныг албан ёсоор угтан авах аж. Үүний дараа Ардын хурлын ордонд Хятад-Оросын хэлэлцээ болохоор төлөвлөгджээ.
Энд дуулгахад, Владимир Путин хамгийн сүүлд 2025 оны 08 дугаар сарын сүүл, 09 дүгээр сарын эхээр Бээжинд айлчлан, ШХАБ-ын дээд хэмжээний уулзалт, Дэлхийн II дайн дууссанд зориулсан ёслолын арга хэмжээнд оролцож байв. Дараа нь 2026 оны 02 дугаар сард Владимир Путин болон Ши Жинпинь нар цахимаар холбогдон ярилцаж байсан. Үүний дараа ОХУ-ын Ерөнхийлөгч БНХАУ-д айлчлах өдрийг хоёр тал тохиролцжээ.
Эх сурвалж: Ведомости
Гэрэл зураг: РИА Новости
