Хүнс, хөдөө аж ахуй, хөнгөн үйлдвэрийн сайд Ц.Идэрбат БНХАУ-аас Монгол Улсад суугаа Онц бөгөөд Бүрэн эрхт Элчин сайд хатагтай Шэнь Миньжуанийг өнөөдөр хүлээн авч уулзлаа.
Сайд Ц.Идэрбат хоёр улсын харилцаа, хамтын ажиллагаа сүүлийн жилүүдэд эрчимтэй хөгжиж байгааг онцолж, БНХАУ-ын Засгийн газар болон Элчин сайдын яамнаас Монгол Улсад хэрэгжүүлж буй төсөл, хөтөлбөрүүдэд тогтмол дэмжлэг үзүүлж ирсэнд талархал илэрхийлэв. Хоёр улсын хамтын ажиллагааг хүнс, хөдөө аж ахуй, хөнгөн үйлдвэрийн салбарт илүү өргөжүүлэн хөгжүүлэх сонирхолтой байгаа гэдгийг мөн дурдлаа.
Тухайлбал, газар тариалангийн үйлдвэрлэлд усалгааны системийг нэвтрүүлэх, төмс, хүнсний ногооны тариалалтад механикжуулалтыг нэмэгдүүлэх зорилгоор бага оврын тоног төхөөрөмжийг угсрах үйлдвэр байгуулах, сэргээгдэх эрчим хүчийг нэвтрүүлэх зэрэг хөдөө аж ахуйн салбарт бодитой ажлуудыг хэрэгжүүлэхэд Элчин сайдын дэмжлэг онцгой чухал гэдгийг тэмдэглэв.
Түүнчлэн одоо хүчин төгөлдөр мөрдөгдөж байгаа протоколуудын хүрээнд хөдөө аж ахуйн бүтээгдэхүүнүүдийг нэвтрүүлэх боомтын тоог нэмэх, тээвэрлэлтийн нөхцөлийг харилцан тохиролцох, Монгол Улсаас гуравдагч улс руу чиглэсэн экспортын бараа бүтээгдэхүүнийг БНХАУ-ын нутаг дэвсгэрээр дамжин өнгөрөх транзит тээвэрлэлтийн явцад тодорхой хүндрэл, саатал үүсэж байгаа тул тээврийн нөхцөл, зохицуулалтыг хялбаршуулж, түргэн шуурхай нэвтрүүлэхэд дэмжлэг үзүүлэх зэрэг санал тавив.
Элчин сайд хатагтай Шэнь Миньжуань хоёр улсын хамтын ажиллагаа хүнс, хөдөө аж ахуй, хөнгөн үйлдвэрийн салбарт өргөн цар хүрээтэй хөгжиж байгаад сэтгэл хангалуун байгаагаа илэрхийлж, Монгол Улсын газар тариалангийн салбарт БНХАУ-ын дэвшилтэт технологийг нэвтрүүлэх, ухаалаг усалгааны системийг нутагшуулах, малын тэжээл, эрдэнэ шиш, царгас, хунчир зэрэг таримал ургамлын хил, гаалийн хорио цээрийн протоколыг байгуулах, боомтуудын хүчин чадлыг нэмэгдүүлэхийн тулд дэд бүтэц буюу хатуу холболтоос гадна хорио цээрийн дэглэм, дүрэм журам, стандарт зэрэг зөөлөн холболтыг мөн сайжруулах зэрэг олон чиглэлээр хамтарч ажиллах боломжтой гэдгийг илэрхийлж, тодорхой асуудлаар санал солилцлоо.
Уулзалтын төгсгөлд сайд Ц.Идэрбат цаашид хоёр улсын хамтын ажиллагааг өргөжүүлэх хүрээнд энэ уулзалтаар хэлэлцсэн асуудлаар тодорхой ажлын төлөвлөгөө боловсруулан, үр дүнтэй хамтран ажиллах саналтай байгаагаа илэрхийлэв.
