Дорнын их яруу найрагч Бэгзийн Явуухулангийн нэрэмжит “Мөнгөн хазаарын чимээ” яруу найргийн наадам амжилттай болж, шилдгүүд тодорлоо.
Уг наадмын тэргүүн байрт Завхан аймгийн Тосонцэнгэл сумын харьяат Тогтохбатын Пүрэвжаргал, дэд байрт Монгол Улсын Соёлын гавьяат зүтгэлтэн, Д.Нацагдоржийн нэрэмжит шагналт яруу найрагч Пэрэнлэйн Нямлхагва, гутгаар байрт яруу найрагч Сумьяасүрэнгийн Батзориг, тусгай байрт “Болор цом”-ын эзэн яруу найрагч Батдоржийн Жамбалдорж, МЗЭ-ийн шагналт яруу найрагч Мулцангийн Уянсүх нар тус тус шалгарлаа.
Энэхүү наадмыг Завхан аймгийн Нутгийн зөвлөл санаачлан, “Явуухулан сан” болон “Мөнх огторгуйн чимэг төв” хамтран зохион байгуулж байгаа бөгөөд монгол хэлний яруу тансаг өвийг түгээн дэлгэрүүлэх, уран бүтээлч залуу үеийг дэмжин урамшуулах, яруу найргийн ариун гэгээн ертөнцийг олон нийтэд түгээх эрхэм зорилгыг өвөрлөж байна.
