АНУ, Израил Ираны эсрэг хамтарсан цэргийн ажиллагааг хоёрдугаар сарын 28-ны өдөр эхлүүлсэн. Энэ өдрөөс хойш АНУ Иран дахь 7000 байд цохилт өгч, олон хөлөг онгоц живүүлсэн гэж АНУ-ын Ерөнхийлөгч Доналд Трамп мэдэгдсэн байна. Тэр дундаа, дрон, пуужин үйлдвэрлэдэг Ираны гурван үйлдвэрт даваа гарагт цохилт өгсөн гэж тэр бээр онцолжээ.
“Ираны дэглэмээс ирж буй аюул заналыг устгахад чиглэгдсэн манай хүчирхэг цэргийн ажиллагаа сүүлийн өдрүүдэд бүрэн хүчээрээ үргэлжиллээ. Тэднийг газрын хөрснөөс арчсан. Агаарын цэргийн хүчин, Тэнгисийн цэргийн хүчнийг нь устгаж, олон хөлөг онгоц живүүллээ. Агаараас эсэргүүцэн хамгаалах системийг нь ч устгаж, тэдгээрийн удирдагчдыг хөнөөсөн” хэмээн Доналд Трамп мэдэгдсэн байна.
Түүнчлэн тэр бээр Ормузын хоолойд хөлөг онгоц аюулгүй нэвтрэх нөхцөлийг хангах уриалгад хариу өгөхгүй удаж байгаа гэж холбоотнуудаа шүүмжилсэн байна.
“Хэдийнэ 40 жил бид та нарыг хамгаалж байна. Гэтэл та нар оролцохыг хүсэхгүй хэвээр л. Бусад орнуудыг бидэнтэй нэгдэхийг би дахин уриалж байна, нэн даруй нэгдэх хэрэгтэй” хэмээн АНУ-ын Ерөнхийлөгч Доналд Трамп мэдэгджээ.
Эх сурвалж: ВВС
