Засгийн газрын Хэрэг эрхлэх газар, “Зөвлөлдөн шийдье” зөвлөлийн ажлын албанаас “Баялгийн сангийн өнөөгийн нөхцөл, тулгамдаж буй асуудал” сэдэвт эрдэм шинжилгээний хурлыг өнөөдөр зохион байгуулжээ. Хуралд эдийн засаг, санхүүгийн мэргэшсэн зөвлөх, эрдэмтэн судлаачид, хувийн хэвшлийн төлөөлөл оролцож хэлэлцүүлэг өрнүүлсэн байна.
Засгийн газар байгалийн нөөц, баялгаа улс орон, иргэдийнхээ эрх ашигт нийцүүлэн тэгш, шударгаар хүртээж, үр дүнг нь бодитоор харуулах зорилтын хүрээнд Үндэсний баялгийн сангийн хуримтлалыг нэмэгдүүлэх, үр өгөөжийг нь тэгш, шударга хуваарилах, оновчтой зарцуулах зэрэг асуудлыг бодлогын түвшинд дахин авч үзэх шаардлагатай гэж үзжээ.
Өнөөдрийн эрдэм шинжилгээний хуралд оролцсон эрдэмтэн, судлаачид Үндэсний баялгийн санд төвлөрсөн баялгийн үр өгөөжийг өнөө болон ирээдүйн иргэддээ тэгш, шударга хүртээх зарчмыг бодитоор хэрэгжүүлэх ёстой гэдэг байр суурь илэрхийлжээ. Учир нь Үндэсний баялгийн сангийн тухай хуульд зааснаар төрөлжсөн сангуудын зарцуулалтыг 2030 он хүртэл царцаасан нь иргэд ойрын таван жил газрын хэвлийн баялгийн өгөөжийг хүртэх боломжийг хязгаарлаж байна гэж үзэж байгаа аж.
Түүнчлэн Үндэсний баялгийн сангийн Хуримтлалын сангийн хөрөнгийг зөвхөн эрүүл мэнд, боловсрол, орон сууц, ипотекийн санхүүжилтийн зориулалтаар зарцуулахаар зохицуулсан нь бодит хэрэгцээтэй нийцэж байна уу гэдгийг ч эргэж харах шаардлагатай гэдэг санааг эрдэм шинжилгээний хурлын үеэр хөнджээ.
2025 оны эцсийн байдлаар Үндэсний баялгийн сангийн төрөлжсөн сангууд болох Ирээдүй өв санд 5.7 их наяд төгрөг, Хуримтлалын санд 1.1 их наяд төгрөг төвлөрөөд байгаа юм.
