МАН-ын 31 дүгээр Их хурал ирэх амралтын өдрүүд буюу 2025 оны арваннэгдүгээр сарын 15,16-ны өдрүүдэд болно. Тус Их хурлаар МАН-ын даргыг сонгох юм. МАН-ын даргад Ерөнхий сайд Г.Занданшатар нэр дэвшин өрсөлдөх нь тодорхой байсан юм. Тэрбээр өнөөдөр мэдэгдэл гаргаж, МАН-ын даргын өрсөлдөөнөөс албан ёсоор нэрээ татаж байгаагаа илэрхийлжээ. Ерөнхий сайд Г.Занданшатар мэдэгдэлдээ,
-Улс орны эрх ашгаа тэргүүн эгнээнд тавьж, намын дотоод асуудал төрийн зовлон болохоос сэргийлэн Монгол Ардын Намын даргын төлөөх өрсөлдөөнөөс нэрээ татаж буйгаа мэдэгдэж байна.
Улсын эдийн засаг, ард түмний амьдралд тулгамдсан олон асуудал шийдлээ хүлээж байна. Авлига, баялгийн хулгайтай хийж буй тэмцлээ тууштай үргэлжлүүлж, иргэдийнхээ орлого, цалин хөлс, тэтгэвэр тэтгэмжийг нэмэгдүүлэх, бусад тулгамдсан олон суурь асуудлыг шийдэхийн төлөө Засгийн газар улам эрчтэй ажиллах болно.
Баялгийн хулгайтай хэзээ ч эвлэрэхгүй. Надад албан тушаал бус улсын төлөө бодит ажил, ард иргэдийн итгэл илүү чухал. Байгалийн баялгаас нийт иргэн бус хэсэг бүлгээрээ хувь хүртдэг шударга бус байдлыг халахын төлөө Засгийн газрын тэргүүний хувьд тууштай тэмцэнэ гэжээ.
