Сайжруулсан шахмал түлшийг хэрхэн зөв хэрэглэх вэ?

Шахмал түлшний зөв хэрэглээг хэвшүүлэх зорилгоор нийслэлийн холбогдох албаныхан, дүүрэг хорооны 5000 гаруй ажилтан төвийн зургаан дүүргийн айл өрхүүдээр явж түлшийг зөв хэрэглэх, зуухны зөв галлагааны талаарх зөвлөмж, мэдээллийг хүргэж ажиллаж байгаа юм байна. Зөвлөмжийг хүргэснээр угаарын хийнд хордсон гэх дуудлага цөөрч, иргэд харьцангуй мэдээлэлтэй болж, зөв дадал хэвшилд суралцаж эхэлсэн байна. Нийслэлийн Мэргэжлийн хяналтын газрын дэд дарга С.Даваасүрэн “Зөв галлагааны зөвлөмж хүргэж ажилласнаар олон нийт мэдээлэлтэй болж иргэдийн дуудлага нэлээд багассан. 24 цагаар ажиллаж байгаа шуурхай албаны албан хаагчид айл өрх бүрт зөвлөмж хүргэхээс гадна ханан пийшингийн аюулгүй байдлыг хангаж ажиллаж байгаа” хэмээн мэдэгдсэн юм. Хүйтний эрч ид чангарч байгаа энэ өдрүүдэд пийшин, зуухаа зөв галлаж, аюулгүй байдлын хангах, сайжруулсан шахмал түлшийг зөв арга технологийн дагуу хэрэглэх талаарх зөвлөгөөг хүргэж байна.