1921-1936 оныг их хэлмэгдүүлэлтийн эхэн үе гэж үздэг ба 1930 онд Тайж Эрэгдэндагва, Егүзэр хутагт Галсандаш, Дилав хутагт Жамсранжав нарын “38-ын бүлэг хэрэг” гэгчид нэр холбогдож, өнгөрч одсон цаг хугацаанд түүх нь толботож, намтар нь гуйвсан нэгэн эрхэм бол Дилав хутагт хэмээх Жамсранжав билээ.
Тухайн үед Дотоодыг хамгаалах газраас Банчин богдын үйл ажиллагаа хийгээд Өвөрмонголын нутагт орж ирээд байсан Япончуудын бодлого, үйл ажиллагаа, Хятад-Японы харилцаа зэргийг тодруулах улс төрийн зорилгоор 1931 оны хоёрдугаар сарын 26-ны шөнө хилээр гаргасан түүнийг гэрчлэх, түүнд даалгавар өгсөн хүмүүс нь өөрсдөө хэлмэгдүүлэлтэд өртөж, гэрчлэх хүн үгүй болсон байдаг.
Түүний түүхийг бодитоор сөхсөн баримтууд нь Дилав хутагтад холбогдох 9 хадгаламжийн нэгжийн 1199 хуудас материал ТЕГ-ын Тусгай архивт хадгалагдаж байсны 1039 хуудас баримтыг төрийн болон албан нууцын тухай хуулийн хүрээнд нууцаас гаргаж, ил болгох шийдвэрийг Засгийн газрын 2022 оны дөрөвдүгээр сарын 27-ны өдрийн хуралдаанаар гаргаснаар түүхийн үнэнийг нийтэд дэлгэсэн юм.
Эх сурвалж: Цагаатгах ажлыг зохион байгуулах улсын комисс
