“Мэгүүн медиа” группээс санаачлан “20 минутын хот Үндэсний хороо”, Хот байгуулалт, барилга, орон сууцжуулалтын яамтай хамтран “Зөөлөн хот 2025” фестивалийг зохион байгууллаа. Хотын иргэдийн ойлголтыг шинэчлэх, иргэдийн оролцоог нэмэгдүүлэх, мэргэжилтнүүд, бодлого боловсруулагчид болон иргэд хамтдаа илүү зөөлөн, сайхан хотыг бүтээх зорилгоор анх удаа зохион байгуулагдсан
тус фестивальд хот төлөвлөлт, барилга, архитекторын салбарын мэргэжилтнүүд төдийгүй сонирхсон иргэд, төр, хувийн хэвшлийн төлөөлөгчид оролцов. Фестиваль үндсэн арга хэмжээ болон үзэсгэлэнгийн хэсэгтэй зохион байгуулагдсан юм.
“Зөөлөн хот-2025” фестивальд “20 минутын хот” Үндэсний хорооны Ажлын албаны дарга Ц.Оюундарь “Нийтийн эзэмшлийн талбай хаачсан бэ?” сэдэвт илтгэлээ танилцуулсан юм. Тэрбээр илтгэлдээ Улаанбаатар хотын хороолол, хотхонуудын дундах 30 хувьд ногдох нийтийн эзэмшлийн талбайнууд 90 хувь нь автомашины зогсоолын зориулалтаар ашиглагдаж байна. Угтаа эдгээр нийтийн эзэмшлийн талбай нь ногоон байгууламж, хүүхдийн тоглоомын талбай, нарлах орон зай зэрэг чөлөөт орон зайд зориулагдах ёстой юм. Зөвхөн автомашинд зориулагдсан төлөвлөлт бус бусад шийдлийг хослуулж, давхар зогсоол эсвэл газар доорх орон зайг ашигласан зогсоол байдлаар төлөвлөх боломжтой. Үүний тулд СӨХ нийтийн эзэмшлийн талбайгаа эзэмшилдээ авч, хамгаалдаг байх нь чухал гэдэг санааг хөндөж, шийдлийг нь танилцуулав.
