Өмнөд Солонгост хэдхэн цагийн өмнө дайны бэлэн байдал зарлажээ. Энэ талаар тус улсын Ерөнхийлөгч Юн Сук Ёл телевизээр ард түмэндээ хандан үг хэлэхдээ “Либерал үзэлтэй Өмнөд Солонгосыг Хойд Солонгосын коммунист хүчний аюулаас хамгаалж, төрийн эсрэг элементүүдийг устгахын тулд цэргийн онц байдал зарлаж байна” гэжээ.
БНСУ-ын Ардын хүчний нам болон гол сөрөг хүчин болох Ардчилсан нам хооронд ирэх оны төсвийн тухай хуулийн төсөл дээр санал зөрөлдөж байгаа энэ үед ийнхүү дайны бэлэн байдал зарласан нь гэнэтийн алхам боллоо гэж тус улсын хэвлэлд бичиж байна. Парламент дахь сөрөг хүчний гишүүд өнгөрсөн долоо хоногт төсвийн хэлэлцүүлэг хийхдээ Юн Сук Ёл Ерөнхийлөгчийн санал болгож буй 677 их наяд воны төсвийн төлөвлөгөөнөөс ойролцоогоор 4.1 их наяд вон (2.8 тэрбум доллар)-ыг танажээ. Үүнд засгийн газрын нөөц сан болон Ерөнхийлөгчийн оффис, прокурор, цагдаа, төрийн аудитын агентлагийн үйл ажиллагааны төсвийг танасан юм байна.
Дайны бэлэн байдал тогтоосноор цөмийн зэвсэгтэй Умард Солонгосын талтай техникийн хувьд дайтаж байгаа өмнөдийн бүх цэргийн ангиудад онцгой бэлэн байдал, сэрэмжлүүлгээ чангатгах үүрэг өгсөн гэж “Ёнхап” агентлаг мэдээлэв.
