УИХ, Засгийн газрын гишүүн, Дэд бүтцийн хөгжлийн сайдын үүрэг гүйцэтгэгч асан С.Зоригийн амь насыг хөнөөсөн хэрэгт ял шийтгэгдсэн Т.Чимгээ, Б.Содномдаржаа нарын эрх ашгийг хамгаалах асуудлаар Олон улсын хүний эрхийн байгууллагатай хамтран ажиллах, санал боловсруулж танилцуулах үүрэг бүхий Ажлын хэсгийг Хууль зүй, дотоод хэргийн сайд О.Алтангэрэл ахалж ажиллахаар болжээ.
Засгийн газрын 2024 оны дөрөвдүгээр сарын 10-ны өдрийн хуралдаанаас Т.Чимгээ, Б.Содномдаржаа нарын зөрчигдсөн эрхийг сэргээж, нөхөн төлбөрийг нь барагдуулахтай холбогдуулж, тухайн үеийн Хууль зүй дотоод хэргийн дэд сайд Б.Солонгоор удирдуулсан ажлын хэсэг байгуулсан юм. Ажлын хэсэгт Хүний эрхийн үндэсний комисс, Шүүхийн ерөнхий зөвлөл, Цагдаагийн ерөнхий газар, Тагнуулын ерөнхий газраас тус бүр төлөөлөл орж ажиллаж буй аж. Т.Чимгээ, Б.Содномдаржаа нарыг төр нийгмийн нэрт зүтгэлтэн С.Зоригийн амь насыг хөнөөсөн хэргээр яллагдагчаар татсан байсан ч прокуророос тогтоолыг хүчингүй болгосон юм.
