Хаврын урь орж, цас мөс хайлж буйтай холбоотойгоор авто зам, замын байгууламжийг шар усны үерээс урьдчилан сэргийлэх арга хэмжээг авч ажиллах үүргийг Зам, тээврийн хөгжлийн төв ТӨҮГ-ын захирал Х.Пүрэвжаргал олон улс, улсын чанартай авто зам хариуцагч компаниудад өгсөн.
Өнөөдрийн /2024.03.25/ байдлаар олон улс, улсын чанартай авто зам хариуцагч компаниуд шар усны үерээс сэргийлэх дараах арга хэмжээ авч ажиллажээ. Тодруулбал,
Авто замын зурвас газрын хог хаягдал, малын сэг зэм, шуудуунд хуримтлагдсан хог, чулуу, бут сөөг зэрэг зүйлийг бүрэн цэвэрлэж ус урсахад чөлөөтэй болгожээ. Зорчих хэсэг болон хөвөө, далангийн хажуу налуугийн цасыг бүрэн цэвэрлэх, ус зайлуулах орох гарах хэсгийн цасыг цэвэрлэсэн байна.
Хаврын шар ус урсан өнгөрөх, голын цөн түрэх, тошин гарч халиа үүсэх явцад байнгын хяналт тавьж арчилж хамгаалах, замын далан, гүүрийн тулгуур, хамгаалах далан сувагт угаагдал үүссэн, үүсэхээр байгаа бол голдирол, чиглэлийг өөрчлөх, урсгалыг залах, угаагдсан хэсгийг тухай бүр засварлажээ.
Ус зайлуулах шуудуу, хиймэл байгууламжийн ёроолын хог хаягдлыг дахин цэвэрлэх, хучилтын суурь хөрс хөвөөнийхөөс түргэн гэсэж хажуугийн чийг замын гол руу шингэх үйл явцыг түргэтгэдэг учир хатаах зэрэг ажлыг хийжээ. Мөн авто зам хариуцагч компаниуд зам, гүүрийн байгууламжид өдөр тутмын үзлэг шалгалтыг тогтмол хийж, зорчих хэсэг, хөвөөний аюулгүй зорчих нөхцөлийг бүрэн хангаж, цаг алдалгүй ажиллаж байна.
