Японы мэргэжлийн сүмод барилдаж байгаа цорын ганц ёкозүна буюу Их аварга цолтон Тэрүнофүжи Г.Ган-Эрдэнэ энэ долоо хоногийн ням гарагт эхлэх шинэ оны эхний башёд зодоглохоор бэлтгэлээ хангаж байна. Тэрбээр сүүлийн гурван удаа дараалан өнжсөн юм. Их аварга Тэрүнофүжигийн дэвжээний багш Исэгахама пүрэв гарагт мэдэгдэхдээ “Тэр өөрийгөө сайн байгаа гэж хэлсэн ч бэлтгэлийн үеэр хийсэн барилдааных нь тоо өмнөхөөсөө цөөн хэвээр байна. Миний харж байгаагаар түүнийг барилдах хүртэл нь би түүний биеийн байдлынх нь талаар хэлж чадахгүй байна” гэжээ..
Өдгөө 32 настай их аварга Тэрүнофүжи Г.Ган-Эрдэнэ өнгөрсөн оны тавдугаар сарын башёд 14-1 гэсэн амжилтаар эзэн хааны цомыг найм дахь удаагаа хүртсэн юм. Гэвч нурууны өвдөлтийн улмаас нагоя башёг дөрөв дэх өдрөөс нь орхисон билээ. Кюүшюү башёгийн дараа 11-р сард болсон Японы сүмогийн холбооны Ёкозүнагийн зөвлөлдөх зөвлөлийн ээлжит хуралдааны үеэр тус зөвлөлийн зарим гишүүн Тэрүнофүжиг шинэ оны анхны тэмцээнд барилдахыг уриалсан юм. Монгол гаралтай ёкозүна чансаа өндөртэй өрсөлдөгчийнхөө эсрэг шаргуу бэлтгэл хийж байгаа ч тамир тэнхээ муутай харагдаж байна хэмээн Японы хэвлэлд онцолжээ.
