Узбекистан улсын Самарканд хотноо зохиогдсон түргэн болон түргэвчилсэн төрлийн Дэлхийн аварга шалгаруулах тэмцээнд Үндэсний шигшээ баг, “Каисса” клубийн шатарчин, Их мастер Т.Мөнхзул түргэн буюу блиц төрөлд шагналт дөрөвдүгээр байрт шалгарсан байна.
Тэрбээр тэмцээний туршид хошуучлагчдын эгнээнд дэлхийн шилдгүүдтэй хамт манлайлан оролцож ,Монголын шатрын түүхэнд алтан үсгээр бичигдэж, үл мартагдах маш том амжилт боллоо хэмээн Монголын шатрын холбоо мэдэгджээ.
Арван долоон өрөг тоглохдоо дэлхийн аварга дөрвөн шатарчинтай оноолт таарч хоёрыг нь хожиж нэгтэй нь тэнцсэн бол нийт арван хоёр эрэгтэйчүүдийн их мастер цолонд хүрсэн энэ цаг үеийн шилдэг эмэгтэй шатарчдыг хожиж, тэнцсэн нь дэлхийн шатрын сонорт хүрсэн гайхамшигтай үзүүлэлт болсон байна.
Эрэгтэй шатарчдын хувьд энэ жил эх орноо төлөөлөн Их мастер С.Билгүүн, ФМ М.Амилал, ФМ С.Чингүүн нар блиц болон рапид төрөлд оролцож, дэлхийн дэвжээнд Магнус Карлсен тэргүүтэй шатарчидтай өрсөлдөж, ур ухаанаа амжилттай сорьжээ.
