Дорноговь аймгийн Айраг сумын хоёрдугаар багт хүчтэй цасан шуурганы улмаас уруудсан мал сүргийг тогтоон барих, уруудсан малыг отор нүүдлийн зохион байгуулалтад оруулж, бүртгэлжүүлэх ажлыг сумын Онцгой комисстой хамтран зохион байгуулж байна. Энэ хүрээнд тус суманд Отрын штаб байгуулан, дулаан байр, хоол, хүнсээр хангах ажлыг хэрэгжүүлж байгаа ажээ. Айраг сумын нутаг Сайн-Ус багийн 30 дугаар зөрлөгийн зүүн талд Дэрст хөтөл гэдэг газар 10 мянга гаруй адуу шуурга уруудан ирээд байгаа ажээ. Эдгээр адууг хумьж яваа иргэд, малчид, ажлын хэсгийн хамт олонд Айраг сумын цэцэрлэгийн хамт олон халуун хоол цайгаар үйлчилжээ.
