Илон Маскийн “Neuralink” компани PRIME Study нэртэй судалгаанд сайн дураараа оролцох хүмүүсийг хайж байна гэдгээ мягмар гарагт өөрийн вэб сайтаараа дамжуулан мэдэгджээ.
Тус компани тавдугаар сард АНУ-ын Хүнс, эмийн бүтээгдэхүүний хяналтын газраас хүн дээр туршилт хийх зөвшөөрлөө авсан юм. Оролцогчид тархины мэс засалд орж “Neuralink”-ийн боловсруулж буй тархины имплантыг туршиж үзэх болно. Тус имплант нь хүнд төрлийн саажилттай хүмүүст зориулагдсан бөгөөд тархин дахь дохиог ашиглан гадны технологийг удирдах боломжийг олгох юм.
“Neuralink” компанийг Илон Маск мэдрэлийн интерфейс хөгжүүлэх салбарыг шилдэг мэргэжилтнүүдийг нэгтгэн, хүний тархинд бараг хязгааргүй тооны электродыг бүрэн автомат горимд суулгах робот бүтээх зорилгоор 2016 оны долоодугаар сард үүсгэн байгуулжээ. Алс хэтэд ийм төрлийн интерфейсийн тусламжтай хүн хиймэл оюун ухааныг сөрөх чадвартай киборг болж, бодлын хүчээр компьютерыг удирдаж сурах боломжтой болно гэж Илон Маск үзэж байна.
2021 оны хоёрдугаар сард “Neuralink” компани сармагчин дээр чип суулгаж, туршилт явуулсан. Судлаачид мэдрэлийн эсийн үйл ажиллагаа, тодорхой үйлдэл хоорондын холбоог судалж, тайлсан нь эсрэг холбоо үүсгэх боломж олгосон байна. Ингэснээр сармагчныг хулгана ашиглалгүйгээр дэлгэц дээрх курсорыг хөдөлгөж сургажээ.
