Өнгө дарсан бүтээн байгуулалт буюу “Мөнгө угаадаг” усан оргилуурууд
УДЭТ-ын өмнөх авто зогсоолыг шинэчлэн тохижуулна гэж хотын ерөнхий менежер мэдэгдээд сар гаруйн хугацаа өнгөрөв. Гэтэл хэд хоногийн өмнөөс уг талбай дээр улаан тоосгон хашаа маягийн юмнууд барьж эхэлсэн нь олны дунд шүүмжлэл дагуулав. Усан оргилуур, эсвэл цэцгийн мандал гэж маргасаар. Хамгийн гол нь тэрхүү бүтээн байгуулалт нь хотын өнгө үзэмжийг гутаахаар ядмагхан “халтуур” байсанд хамаг учир байв. Хоёр гурван өдөр цахим орчин улаан тоосгон дээр шавар овойлгосон усан оргилуур, цэцгийн мандал аль нь мэдэгдэхгүй хэдэн тахир байгууламжийг шүүмжилсэн, бухимдсан үгсээр дүүрэв. Харин өнөөдөр өнөөх хэдэн тоосгон овоолгуудаа юу ч үлдээлгүй нураагаад трактороор түрж орхижээ.
Ийм амархан нурааж болдог, ухарч буцаж, цуцалж болдог төлөвлөлт, төсөв, бүтээн байгуулалт ажээ. Цаана нь татвар төлөгчдийн л мөнгө урсаж байгаа. Драмын өмнөх алга дарамхан газрыг тоосго өрж, шавар овоолохгүйгээр, өөрсдийнх нь ярьж байсанчлан олон улсын жишгээр хүн амарч зугаалахад таатай орчин болгоод тохижуулчихад яагаад болохгүй байгаа юм бэ. Заавал цахим орчинд хэрүүл, шүүмжлэл өрнүүлж, буцааж буулгах шаардлага байсан юм уу. Татвар төлөгчдийн мөнгөөр ингэж айл гэр болж тоглож байгаа мэт наадаж зугаацах нь хэнд ашигтай вэ. Мэдээж дарга нарт.
Хэрвээ УДЭТ-ын өмнөх талбайд заавал нэг юм хийсэн болж, “мөнгө угаах” гээд байгаа юм бол унадаг дугуй, цахилгаан скүүтэрийн нэгдсэн зогсоолтой, амралт чөлөөт цагийн бүс байгуулъя. Хотын А бүсэд байрлах энэ талбайгаас иргэд цахилгаан скүүтэр унаад гэр гэр рүүгээ явахад бүх чиглэлийн замын зангилаа нь болно. Өглөө тал талаас ДБЭТ-ын өмнөх талбайдаа ирж унадаг дугуй, скүүтэрээ тавьчихаад ажил ажил руугаа алхахад яг тохирох газар. Уг талбайд авто машин тавьдаг байхад байнгын харуул хамгаалалттай байж болоод байсан юм чинь унадаг дугуй, скүүтэрийн зогсоолыг ажлын цагаар харуул хамгаалалттай болгоход амархан. Гэтэл УДЭТ-ын өмнөх талбайд хийж байгаа тохижилт нь эхний байдлаар бүтэлгүйтэв. Дараагийн сюрприз юу байхыг таашгүй.
Хийх хүн аргаа олдог, хийхгүй хүн шалтгаа олдог гэж үгийг л хотын удирдлагуудад хаягламаар байна.
