Дархлаажуулалтын тухай хуульд нэмэлт оруулах тухай хуулийн төслийг Засгийн газрын өнөөдрийн хуралдаанаар хэлэлцээд УИХ-д өргөн мэдүүлэхээр тогтсон байна.
Хуулийн төсөлд туссан гол өөрчлөлт нь
- А вируст гепатит,
- пневмококк,
- хүний папиллома вирусийн халдварын эсрэг вакциныг заавал хийх дархлаажуулалтад хамрагдах сэргийлэх тарилгын нэр төрөлд нэмж тусгахаар зохицуулжээ. Эдгээр вирусийн халдварын эсрэг дархлаажуулалтыг заавал хийдэг болсноор элэгний халдварт өвчлөл, амьсгалын замаар дамжих уушигны халдварт өвчлөл, умайн хүзүүний хорт хавдраас бүрэн сэргийлэх боломж бүрдэх юм.
Одоо хүчин төгөлдөр мөрдөгдөж буй Дархлаажуулалтын тухай хуулийн 10.1-т зааснаар Заавал хийх дархлаажуулалтад сүрьеэ, халдварт саа /полиомиелит/, В вируст гепатит, сахуу, хөхүүл ханиад, татран, улаанбурхан, В хэв шинжийн хемофилюс инфлюенза нянгийн халдвар, гахай хавдар, улаануудын эсрэг сэргийлэх тарилга ордог.
