Цахилгаан авто машины хэрэглээг нэмэгдүүлэх Ажлын хэсэг байгуулна

Монгол Улсын Ерөнхий сайд Л.Оюун-Эрдэнэ АНУ-ын цахилгаан автомашин үйлдвэрлэгч “Tesla”компани,  сансар судлалын “SpaceX” компанийн гүйцэтгэх захирал,  сошиал платформын “Twitter” компанийн технологи хариуцсан захирал Илон Масктай хийсэн уулзалтын талаар Засгийн газрын хуралдаанд танилцуулжээ.
Сансар судлалын “SpaceX” компанийн бүтээсэн “Starlink” хиймэл дагуулууд дэлхийн өнцөг бүрд өндөр хурдны интернэт хүргэх зорилготой. Монгол Улсын интернэтийн хэрэглээ бага газруудад өөрсдийн сүлжээг нэвтрүүлэх бүрэн боломжтой бөгөөд туршилтын станцуудаа суурилуулж туршилт хийхэд бэлэн байгаа гэж Илон Маск дурджээ. “Starlink” компани АНУ, Канад, Англи, Шинэ Зеланд зэрэг томоохон улсуудад үйл ажиллагаагаа явуулж байгаа. Азид 2022 онд, Филиппинд 2023 онд үйлчилгээгээ нэвтрүүлээд өнөөгийн байдлаар 4000 гаруй нам орбитын хиймэл дагуул хөөргөн, дэлхийг хамарсан хиймэл дагуулын сүлжээг бий болгоод байгаа аж. Монгол шиг өргөн уудам нутагтаа улс оронд интернэтийн сүлжээг нэмэгдүүлэхэд шинэ дэд бүтэц бий болгох шаардлага бий. Тиймээс “Starlink” компани Монголд үйл ажиллагаагаа явуулахад бүх талаар дэмжлэг үзүүлэх талаар Ерөнхий сайд Илон Масктай цахимаар уулзахдаа илэрхийлжээ.
Засгийн газрын өнөөдрийн хуралдаанаас Монгол Улсад цахилгаан авто машины хэрэглээг нэмэгдүүлэх Ажлын хэсэг байгуулж ажиллахыг Зам, тээврийн хөгжлийн сайд С.Бямбацогтод үүрэг болгосон байна.