Японы мэргэжлийн сүмогийн нацү башёгийн 13 дахь өдрийн дараах байдлаар их аварга Тэрүнофүжи Г.Ган-Эрдэнэ, сэкивакэ Кирибаяма Б.Лхагвасүрэн нар башёг тэргүүлж байна. Тэрүнофүжи өнөөдөр башёг тэргүүлэгчдийн хоёрдугаар эгнээнд бичигдэж байсан маэгаширагийн 14 дэх бөх Асаноямаг давж 12 даваа, нэг унаатайгаар башёг ганцаар тэргүүлж байна. Кирибаяма өнөөдөр нутгийн дүү Хокүсэйхо А.Даваанинжаар даваагаа ахиулж 11 даваа, хоёр унаатайгаар башёг тэргүүлэгчдийн хоёрдугаар эгнээнд бичигдэж байна. Хокүсэйхогийн хувьд сүүлийн хоёр өдөр нутаг нэгт сэкивакэ цолтнуудтай оноолт тааран хоёуланд нь өвдөг шороодлоо.
Өнөөдөр сэкивакэ Хоошорюү С.Бямбасүрэн ээлжит даваагаа авснаар есөн даваа дөрвөн унаатай болжээ. Тамаваши Б.Мөнх-Оргил учраагаа давснаар долоон даваа, зургаан унаатай тэмцээнийг үргэлжлүүлж байна. Чоёошома Г.Мөнхсайхан учраагаа давснаар мөн долоон даваа, зургаан унаатай болжээ. Манай хоёр бөх үлдсэн хоёр өдрийн аль нэгэнд давахад 50-иас дээш хувийн амжилтаа үзүүлнэ. маэгаширагийн 14 дэх бөх Миторюү Б.Төрболд өнөөдөр өвдөг шороодсоноор дөрвөн даваа, есөн унаатай болж, долдугаар сарын башёд жюүрёо зиндаанд эргэн буух нь тодорхой болж байна.
