Сүхбаатар аймгийн Эрдэнэцагаан сумын Хадын булаг багийн Уртын цагаан гэх газар 2023 оны дөрөвдүгээр сарын 08-ны 11:30 минутын үед гарсан ой хээрийн түймэр Дорнод аймгийн Матад сумын нутагт орж ирсэн мэдээг 2023 оны дөрөвдүгээр сарын 08-ны шөнө 00:00 цагт Дорнод аймгийн Онцгой байдлын газар хүлээн авсан байна.
Хариу арга хэмжээг цаг алдалгүй авч байгаа хэдий ч цаг агаарын нөхцөл байдлаас шалтгаалан салхины хурд секундэд 12-19 метр хүрч ширүүсэн, салхины чиг өөрчлөгдөж байгаагаас галын тархац их болж, хүчтэй салхины улмаас байгалийн аюултай үзэгдэлийн хэмжээнд хүрчээ. Дорнод аймгийн нийт нутгаар салхи их төлөв баруунаас секундэд 12-19 метр хүрч ширүүсэж байгаа юм байна.
Гал нтраах үйл ажиллагаанд хүч нэмэгдүүлэхээр Хэнтий, Сүхбаатар аймгийн Онцгой байдлын газрын алба хаагчид замд гарч, ОБЕГ-ын Гал түймэртэй тэмцэх газрын хэлтсийн дарга, дэд хурандаа П.Соронзонболдоор ахлуулсан Үндэсний аврах бригадын алба хаагчид, Зэвсэгт хүчний 303 дугаар ангийн нисдэг тэрэг /МИ-171/-ээр түймрийн голомт руу нисэхээр бэлдэж байгаа аж.
Тал хээрийн түймрийн улмаас 3 айл өрх орон гэргүй болж, тодорхой тооны мал амьтад хашаатайгаа шатаж гамшгийн хэмжээнд хүрчээ. Түймрийг унтраахаар Дорнод, Сүхбаатар аймгийн ОБГ-ын ажилтан албан хаагчид болон тухайн сумын иргэд дайчлагдан нийт 250 гаруй хүн ажиллаж байна. Эдгээр ажиллаж буй хүмүүст яаралтай хоол хүнс болон ариун цэврийн тусламж шаардлагатай болоод байгаа тул Дорнод аймгийн Онцгой комиссын 2023 оны дөрөвдүгээр сарын 10-ны өдрийн хурлаас шийдвэр гарч улаан загалмайн хороон дээр хүмүүнлэгийн тусламжийг төвлөрүүлж ажиллах шийдвэр гаргажээ. Иймд худалдаа үйлчилгээ явуулдаг аж ахуй нэгж байгууллага болон ард иргэдийг нэгдэн ажиллахыг уриалж байна.
