Дөрөвдүгээр сарын 01-нд эхэлсэн Тайландын олон улсын олон өдрийн тэмцээн зургаан өдөр үргэлжилж нийлбэр дүнгээр 1-р байрт “Roojai” Тайландын мэргэжлийн баг, “Алдар” спорт хорооны тамирчин, ОУХМ Б.Тэгшбаяр , 2-р байрт “Terengganu” Малайзын мэргэжлийн баг, Улсын шигшээ багийн тамирчин, ОУХМ С.Жамбалжамц нар орж Монголын дугуйн спортын түүхэнд цоо шинэ хуудсыг нээн UCI 2.1 ангиллын тэмцээнд анх удаа Монголын хоёр тамирчин дараалан шилдэг байруудыг эзэллээ.
2021 оны “Tour of Thailand” тэмцээнд ОУХМ С.Жамбалжамц түрүүлж шинэ хуудсыг нээж байсан бол өнөөдөр тэр амжилтаа бататгахын зэрэгцээ эхний шагналт хоёр байрыг Монголын дугуйчид эзлэж буй нь манай дугуйчид мэргэжлийн түвшинд өрсөлдөх чадвартай болсоноо батлан харууллаа.
Ийнхүү тэмцээний аварга ОУХМ Б.Тэгшбаяр UCI 139 оноо, ОУХМ С.Жамбалжамц UCI 85 оноо авч Монголын багийн Олимпийн эрх авах оноо болон байр өсөн дэвшилээ.
