Жил бүр болдог “Автомашингүй өдөр” энэ сарын 15-ны бямба гарагт тохионо. Энэ өдөр “Дугуйтай гудамж” төслийн хүрээнд унадаг дугуйн хэрэглээг сурталчилсан анхны өдөрлөгийг Улсын их дэлгүүрийн урд талын “Битлз”-ийн талбайд зохион байгуулахаар болжээ. Уг өдөрлөгийн хүрээнд олон арга хэмжээ зохиож, дугуйтай холбоотой байгууллага, клуб, баг тамирчид, сонирхогчид болон бусад байгууллагуудыг оролцуулах юм байна.
Өдөрлөгийн үеэр унадаг дугуйн дэлгүүрүүдийн худалдаа, засвар үйлчилгээ, банкуудын ногоон зээлийн танилцуулга, дугуйн түрээсийн үйлчилгээ, дугуй сонирхогчдын чөлөөт худалдаа, солилцоо, бүх насны хүүхдийн дугуйн уралдаан, анхан шатны дугуйн сургалт, зөвлөгөө, дугуйн түүх хөгжлийг харуулсан үзэсгэлэн, унадаг дугуй болон түүнтэй холбоотой үйлдвэр, үйлчилгээ зэрэг олон үйл ажиллагаа зохион байгуулахаар төлөвлөжээ.
