УИХ, Засийн газарт өнөөдөр хэд хэдэн шинэ томилгоо хийлээ. МАН-ын Удирдах зөвлөл өчигдөр хуралдаж, нэр бүхий зарим хүнийг албан тушаалд томилуулах улс төрийн шийдвэр гаргасан юм байна. Тухайлбал, УИХ-ын дэд даргаар УИХ-ын гишүүн Л.Мөнхбаатарыг томиллоо. УИХ-ын дэд даргаар ажиллаж байсан Т.Аюурсайхан Хөдөлмөр, нийгмийн хамгааллын сайдаар томилогдсоноор уг албан тушаалд нөхөн томилгоо хийж буй нь энэ юм.
Засгийн газар өнөөдөр ээлжит бус хуралдаан зарлаж, зарим сайд нарын томилгоог хэлэлцэн шийдвэрлэжээ. Ерөнхий сайд Л.Оюун-Эрдэнэ УИХ-ын нэгдсэн хуралдаанд Боомтын асуудал хариуцсан сайд бөгөөд Боомтын сэргэлтийн үндэсний хорооны даргаар УИХ-ын гишүүн Х.Булгантуяаг, Барилга, хот байгуулалтын сайдаар УИХ-ын гишүүн Ц.Даваасүрэнг, Эрүүл мэндийн сайдаар УИХ-ын гишүүн С.Чинзоригийг тус тус томилж буйгаа УИХ-д танилцуулж дэмжлэг авснаар шинэ сайд нар тангараг өргөж, ажилдаа орлоо. Мөн Эдийн засгийн хөгжлийн сайд Ч.Хүрэлбаатарыг Шадар сайдаар томилж, тангараг өргүүлэв. Ийнхүү Засгийн газар хоёр Шадар сайдтай ажиллахаар болж байна.
Засгийн газрын өнөөдрийн ээлжит бус хуралдаанаар Гантөмөрийн Түвдэндоржийг Эдийн засаг, хөгжлийн дэд сайдын, Мягмаржавын Ганбаатарыг Байгаль орчин, аялал жуулчлалын дэд сайдын, Охиндоогийн Цэндсүрэнг Уул уурхай, хүнд үйлдвэрийн дэд сайдын, Жаргалцэнгэлийн Эрхэмбаатарыг Цахим хөгжил, харилцаа холбооны дэд сайдын, Сэрээжавын Энхболдыг Эрүүл мэндийн дэд сайдын албан тушаалд тус тус томилжээ.
