АНУ-ын Төлөөлөгчдийн танхимын дарга Нэнси Пелоси өчигдөр буюу мягмар гаригийн орой Малайзаас Тайваньд хүрэлцэн очжээ. Пелоси болон түүнийг дагалдан яваа төлөөлөгчид АНУ, БНХАУ-ын харилцааг шинэ доод түвшинд хүргэх эрсдэлтэй айлчлалаа эхлүүлэхээр ийнхүү Тайпэйд хөл тавилаа. Нэнси Пелосиг Тайванийн Гадаад хэргийн сайд Жозеф Ву, АНУ-ын Тайвань дахь дээд төлөөлөгч Сандра Оудкирк нар “Соншан” нисэх буудалд угтан авчээ. Энэ үеэр тэрбээр, хятадууд өөрсдийгөө захирдаг гэж зарласан арлын талаар Америкийн гуйвшгүй амлалтыг харуулж байна гэж мэдэгдсэн байна. Харин БНХАУ АНУ-ын Төлөөлөгчдийн танхимын даргын дээд хэмжээний айлчлалыг буруушаасаар байгаа юм. Тэд АНУ сүүлийн 25 жилийн турш Тайванийн хоолойн энх тайван, тогтвортой байдалд заналхийлсэн гэж үзэж буй юм.
Орос Украины дайны улмаас олон улсын нөхцөл байдал хурцадсан энэ үед АНУ-ын өндөр албан тушаалтан Тайваньд ирсэнд БНХАУ асар хүчтэй эсэргүүцэж, хариу үйлдэл үзүүлж байгаа юм. БНХАУ Тайванийг өөрийн нутаг дэвсгэрийн нэг хэсэг гэж үздэг бөгөөд өөрийн мэдэлд оруулахын тулд хүч хэрэглэхээс хэзээ ч татгалзаж байгаагүй. Тиймээс энэ айлчлалыг Тайванийн эсрэг цэргийн ажиллагаа явуулах шалтаг болгон ашиглахгүй байхыг АНУ БНХАУ-ыд анхааруулжээ.
Пелоси Тайваньд газардсаныхаа дараа мэдэгдэл хийхдээ “Манай Конгрессын төлөөлөгчид Тайваньд айлчилж байгаа нь АНУ Тайванийн эрч хүчтэй ардчиллыг дэмжих амлалтаа хүндэтгэж байгаагийнх” гэжээ. Мөн тэрбээр “Дэлхий даяар дарангуйлал, ардчилал хоёрын аль нэгийг сонгох сонголтын өмнө тулгараад байгаа өнөө үед Тайванийн 23 сая хүн амтай Америкийн ард түмэн эв санааны нэгдэлтэй байх нь урьд өмнөхөөсөө илүү чухал болж байна” гэжээ.
Эх сурвалж: “Ройтерс” агентлаг.
