ХБНГУ-д суралцаж буй залуу хөгжмийн зохиолч Э.Шүтээн тус улсад зохион байгуулагддаг Биберахын олон улсын жазз хөгжмийн наадмаас шилдэг хөшжмийн зохиолчийн дэд байрын шагнал хүртжээ. ХБНГУ-ын Биберах хотноо уламжлал болгон зохион байгуулагддаг энэхүү жазз хөгжмийн наадам олон улсад асар нэр хүндтэй бөгөөд шилдэг хөгжмийн зохиолч, хөгжимчид оролцдог юм байна.
Э.Шүтээн эдүгээ ХБНГУ-ын Мюнхен хот дахь Хөгжим ба театрын урлагийн их сургуулийн жазз хөгжмийн зохиолчийн магистрантурт суралцаж буй юм. Тэрбээр 2021 оны нэгдүгээр сарын 20-21-нд болсон Курт Маасын нэрэмжит Жазз хөгжмийн олон улсын уралдаанд тэргүүн байр эзэлж байв. Түүний бүтээлийг уралдааны шүүгчид “өөрийн гэсэн өвөрмөц өнгө аястай, хөгжмийн зохиомжийнхоо хувьд зохиолынхоо оршил, өрнөл, төгсгөл хэсгийг сайн тооцоолж хийсэн бүтээл байна” гэж үнэлж байжээ.
Ташрамд сонирхуулахад залуу хөгжмийн зохиолч Э.Шүтээн ДБЭТ-ын ерөнхий найруулагч, Монгол Улсын Урлагийн гавьяат зүтгэлтэн Г.Эрдэнэбаатарын охин юм. Г.Эрдэнэбаатар гавьяатыг “Гэргий”, “Шүтээн” зэрэг олон дуугаар нь ард түмэн сайн мэднэ.
