Төр хувийн хэвшлийн түншлэлээр “Хангарди” терминаль, Төмөр замын гаалийн хяналтын бүс, “Улаанбаатар экспо” үзэсгэлэнгийн танхим, Хүнс барааны бөөний худалдааны төв зэргийг хотын баруун хэсэгт буюу Сонгинохайрхан дүүргийн 32 дугаар хороонд байгуулахаар төлөвлөж байгаа. Өнөөдөр тус ажлын хэсэг хуралджээ. Хүнс барааны бөөний худалдааны төв байгуулагдсанаар баруун 16 аймгийн 1.3 сая иргэний хэрэгцээ шаардлагыг хангах, мөн түгжрэлийг бууруулахад бодит нөлөө үзүүлнэ гэж тооцоолж байгаа юм.
Олон улсын худалдаа, логистикийн төв 2021-2025 онд нэн тэргүүнд хэрэгжүүлэх долоон төсөл боловсруулсны нэгээхэн хэсэг нь дээр дурдсан бүтээн байгуулалтууд юм. Тус төв “Хангарди терминаль” төсөл, Төмөр замын гаалийн хяналтын бүс төсөл, “Улаанбаатар экспо” үзэсгэлэнгийн танхим, Авто сэлбэг, тос тосолгооны материал, дагалдах хэрэгслийн бөөний төв, Хүнс барааны бөөний худалдааны төв төсөл, “Шувуут нуур” төсөл, Мод үржүүлэг, нуурын тохижилт, хамгаалалтын бүс тогтоох, зураглал гаргах төсөл багтжээ. Эдгээр төсөл цогцоороо хэрэгжих аваас нийслэлийн баруун дүүрэгт тээвэр логистик, гаалийн хяналтын бүс, олон улсын худалдаа, үйлчилгээний төв, аялал жуулчлал, амралт чөлөөт цагийн эко цогцолбор бүхий цоо шинэ төв бий болно гэж тооцоолж буй аж.
