Улсын хэмжээнд 1500 гаруй СӨХ үйл ажиллагаа явуулдаг бөгөөд Улаанбаатар хотод 926 СӨХ байдаг. СӨХ-ны үйл ажиллагаа, эрх үүргийг нь хамгаалах зорилготой СӨХ-дын Дээд зөвлөлд 900 СӨХ нэгдсэн аж.
Сууц өмчлөгчдийн холбоо буюу СӨХ-ны сарын төлбөрийн тухайд хөдөө орон нутагт дунджаар 3000-15000 төгрөг орчим, Улаанбаатар хотод 15000-30000 төгрөг орчим байдаг бол 10 хүрэхгүй хувь нь 200000 төгрөгөөс дээш төлбөр авдаг байна. Эдгээр СӨХ-дод нийт 24000 орчим ажилтан, албан хаагчид ажилладаг.
Харин иргэдийн дунд СӨХ-ны үйл ажиллагаа, үйлчилгээг төдийлөн сайн мэддэггүй бөгөөд СӨХ-ны төлбөр огт төлдөггүй айлууд ч байдаг байна. Тиймээс Шударга өрсөлдөөн, хэрэглэгчийн төлөө газарт иргэд СӨХ-ны асуудлаар дараах гомдлыг ирүүлдэг. Үүнд
- Сууц өмчлөгчдийн холбооны төлбөр, хураамж, зарцуулалт, хяналт
- СӨХ ус, цахилгаан тасалж байгаа тухай
- СӨХ-ны дундын өмчлөлийн засвар үйлчилгээ
- Хууль бусаар СӨХ байгуулсан, СӨХ-г солих шаардлагатай тухай
- Орон сууцны засвар, үйлчилгээ үзүүлж буй компани СӨХ-ны үйл ажиллагаа явуулж байгаа тухай шүүмжлэлтэй ханддаг байна.
Иймд аль аль талдаа ойлгомжтой байх үүднээс иргэний төлж буй СӨХ-ны төлбөр хаана, юунд зарцуулагддаг тухай, иргэн СӨХ-д ямар үнэлгээ өгөх, ямар шаардлага тавьж болох талаар, СӨХ, иргэний харилцан эрх үүргийг тодорхой болгох хэрэгтэй үзсэн байна. Эдгээр асуудлыг шийдвэрлэж, СӨХ-ны үйл ажиллагааг шилэн болгож нэгдсэн аппликэйшнтэй болж байгаа тухай өнөөөр олон нийтэд зарлалаа. Эхний ээлжид СӨХ-дын Дээд зөвлөлийн гишүүн 900 СӨХ үүнд хамрагдаж үйл ажиллагаагаа ил тод, нээлттэй болгохоо илэрхийлжээ.
Тус аппликэйшны хөгжүүлэлтийг “Юү Би колл” ХХК гүйцэтгэсэн бөгөөд үйлчилгээндээ ашиглахыг хүссэн аль ч СӨХ-д үнэ төлбөргүй, хугацаагүйгээр ашиглах эрх олгож байгаа юм байна. Хамгийн гол нь иргэд сэтгэл ханамжтай байж, хүн бүрт эргэлзээтэй байсан СӨХ-ны асуудлууд шилэн болох нь чухал юм.
ШӨХТГ-аас хэрэгжүүлж буй Монгол Улсад тулгамдсан 76 асуудлын нэг болох СӨХ-ны асуудал ийнхүү шийдвэрлэгдлээ гэдгийг өнөөдөр болсон хэвлэлийн хурлаар ШӨХТГ-ын дарга Б.Бат-Эрдэнэ, СӨХ-дын Дээд зөвлөлийн гүйцэтгэх захирал М.Галбаатар, “Юү Би колл” ХХК-ийн захирал Н.Отгонбаяр нар онцоллоо.
